ഗുരുവായൂര്‍: ഗുരുവായൂര്‍ ക്ഷേത്ര ദര്‍ശനത്തിനെത്തിയ ഡോക്ടറെയും മാതാവിനെയും കള്ളക്കേസില്‍ കുടുക്കി മ്യഗീയമായി മര്‍ദിച്ച ഗുരുവായൂര്‍ എസ് ഐ. എം സുരേന്ദ്രനെ സര്‍വ്വീസില്‍ നിന്നും മാറ്റി നിര്‍ത്തി അന്വഷിക്കണമെന്നാവശ്യപ്പെട്ട് ഓള്‍ കേരള നിയമ സഹായ വേദി ചെയര്‍മാന്‍ അഡ്വ.സി ഐ എഡിസണ്‍ ഇന്നലെ ഗുരുവായൂരില്‍ ശയനപ്രദക്ഷിണം നടത്തി കിഴക്കെ നടയില്‍ മഞ്ജുളാലിനു സമീപമായിരുന്നു ശയനപ്രദക്ഷിണം. ശയനപ്രദക്ഷിണം കവിയൂര്‍, കിളിരൂര്‍ ആക്ഷന്‍ കൌണ്‍സില്‍ സെക്ക്രട്ടറിയും മനുഷ്യാവകാശ പ്രവര്‍ത്തകനുമായ രാജു പുഴങ്കര ഉദ്ഘാടനം ചെയ്തു. മനുഷ്യാവകാശ പ്രവര്‍ത്തകരായ സജീവന്‍ കാരമുക്ക്, രാമക്യഷ്ണന്‍ പൊറ്റക്കാട്, പി.യു.സി.എല്‍ പ്രവര്‍ത്തകരായ രാമചന്ദ്രന്‍ പേനകം, ജയന്‍ കുറുമ്പൂര്‍, സെയ്തു ഹാജി, ജെറി വാഴപ്പിള്ളി എന്നിവരുടെ സാന്നിധ്യത്തിലായിരുന്നു ശയനപ്രദക്ഷിണം. കൊല്ലം തേവള്ളി നവശ്രീയില്‍ ഡോക്ടര്‍ പ്രേംശങ്കറും മാതാവ് കോട്ടയം ജല അതോറിറ്റി ഉദ്യോഗസ്ഥ ഗീതയും ക്ഷേത്ര ദര്‍ശനത്തിനെത്തിയ തങ്ങളിരുവരെയും ട്രാഫിക് നിയമം തെറ്റിച്ച് വാഹനമോടിച്ചെന്നാരോപിച്ച് ഗുരുവായൂര്‍ എസ് ഐ. എം സുരേന്ദ്രന്‍ കള്ളക്കേസെടുത്ത് മര്‍ദിച്ചെന്ന് കാട്ടി ഉന്നത ഉദ്യോഗസ്ഥര്‍ക്ക് പരാതിയും ചാവക്കാട് കോടതിയില്‍ കേസും നല്‍കിയിരുന്നു. എസ് ഐക്കെതിരെ നടപടിയെടുക്കണമെന്നാവശ്യപ്പെട്ട് അഡ്വ.സിഐ എഡിസണ്‍ കഴിഞ്ഞ ദീവസം ഗുരുവായൂരില്‍ ഏകദിന നിരാഹാര സമരം നടത്തിയിരുന്നു. സംഭവത്തില്‍ എസ് ഐയെ മാറ്റി നിര്‍ത്തി ഐ.ജി തലത്തില്‍ അന്വേഷണം വേണമെന്നാവശ്യപ്പെട്ടായിരുന്നു ഇന്നലത്തെ സമരം.